aasha

baitha hu tanha main yu hi
bojhal saasein ye meri hain
tum chali gayi per chor gayi
wo baatein ab tak teri hai

main sunta hu jeevan mela
kab kaun mile kuch pata nahi
kuch aashayein jag jaye to
is dil ki koi khata nahi

aisa bhi kuch sun rakha hai
mann khoj khoj thak jata hai
jab chor chuko tum aas kisi ki
tab khud hi wo mil jata hai

kuch baat naseebo ki shayad
upar se likh kar aati hai
tum lakh karo socho chaho
wo honi hoti jati hai

per phir bhi kya samjhau main
ye dil to bhola bhala hai
main rok ise thak jata hu
ye tumhe dhundhta jata hai

ab kaun ho tum kya pata tumhara
ye bhi to malum nahi hai
ye ziddi dil per kehta hai
apni pehchaan purani hai


ab kya janu main kya iski
aage kya kya abhilasha hai
kuch bolu to wo kehta hai

jeevan kya hai?? bas aasha hai